Te Whare E Tu Nēi

Ko te wehi ki a Ihowa te timatatanga o te whakaaro nui. Whai kororia te Atua i runga rawa, he maungarongo ki runga ki te mata o te whenua, he whakaaro pai ki nga tangata katoa.

E nga mana nui o te Tai Tokerau, nga iwi karangaranga e pupuri ana i te ture tangata, i te ture wairua i nga peka katoa o te takiwa nui nei, tena tatou. Tena hoki tatou me nga mate o te wa. Ko te mihi aroha ki a koutou e te hunga wairua, a, haere mai haere. Haere atu ki Hawaiiki, ki nga po, ki te matatorutanga o te hunga kua okioki. Hoki rawa mai ki a tatou te hunga ora – e ora nei, e mahi nei, e pokaikaha nei ki tenei taumata, tena koutou, tena koutou, tena tatou katoa.

Tenei te whakatako i nga mahi kua whakaarohia hei mahinga ma matou i roto i nga tau kei te heke mai nei. Ko te mahi nui, ko te arataki i te iwi kia haere i runga i nga ara o te tika, o te pono, i raro i te maru o te aroha. Ko te putake ake o Te Whare Ruruhau o Meri, ko te aukati i nga mahi tukino i waenga i nga whanau; ko te whangai rongoa ki nga whanau kua pa mai enei kino ki to ratou whare. He aha ai? Kia tae mai te rangatiratanga o te Atua, kia tae mai ki runga ki to tatou whenua.

Ka tutuki ake enei mahi i nga tau kei tua i runga i te upoko pakaru, i runga i te kotahitanga, i runga i nga inoi, karakia o te iwi, ka tutuki ake i runga hoki i te ngakau whakaiti.

Ko te mahi whakapakari tenei, hei whakahou i te Whare Ruruhau o Meri te aro atu ki nga mahi whakaora i to tatou iwi.

E mara ma, haere mai tetahi ahua!